// docs

Primeiros pasos

1. Gravar a ISO

Descarga a ISO e verifica o seu SHA-256 antes de nada (consulta Descargar).
Grávaa nun USB. A ISO é híbrida: cópiase tal cal ao dispositivo, sen descomprimir nin «instalar» nada. En Linux:

sudo dd if=redderos-ubuntu-amd64.iso of=/dev/sdX bs=4M status=progress conv=fsync

Substitúe /dev/sdX polo USB (compróbao con lsblk). Todo o que haxa nese USB bórrase.

Para probala sen USB, nunha máquina virtual:

qemu-system-x86_64 -m 3G -enable-kvm -cdrom redderos-ubuntu-amd64.iso

Con 2 GB de RAM arrinca, pero o sistema cópiase enteiro á memoria (toram), así que co escritorio convén darlle 3 GB ou máis.

2. Arrincar

Arrinca o equipo desde o USB. RedderOS funciona en BIOS e en UEFI. O menú de GRUB agarda 5 segundos e entra en RedderOS, que é a entrada de uso normal. As demais explícanse en Menú de arranque.

O sistema cópiase á RAM e a partir de aí non usa o disco interno do equipo: non o monta nin activa a súa swap, aínda que a teña.

3. A pantalla de acceso

Ao rematar de arrincar aparece a pantalla de acceso de RedderOS (a súa interface está en castelán). Non mostra ningunha lista de perfís: non existe. Só hai dous campos, Perfil e Frase de paso. Na esquina inferior vese o estado de Tor.

Sesión amnésica: deixa Perfil baleiro e preme Enter (o botón di «Sesión amnésica»). Entras como o usuario anon nun cartafol persoal baleiro. Todo vive na RAM e bórrase ao pechar sesión ou apagar. É o modo recomendado se non necesitas conservar nada.
Abrir un perfil: escribe o nome do perfil e a súa frase. O sistema búscao en todos os discos conectados e, se o atopa, abre o teu escritorio co teu /home cifrado.

Desde a mesma pantalla podes apagar ou reiniciar. O teclado está en español, tanto aquí coma no escritorio e na consola.

4. O escritorio

É un escritorio Xfce, escuro e cunha soa área de traballo. Trae tres accesos directos:

Acceso	Que fai
Tor Browser	A primeira vez descarga Tor Browser por Tor e verifica a súa sinatura. Logo ábreo.
Terminal	Unha terminal Xfce.
Estado de RedderOS	Executa `redder-status`: Tor, devasa e endurecemento, dunha ollada.

A rede só funciona a través de Tor. Mentres Tor non se conecte non hai conexión: é o esperado, non un fallo (consulta Rede e Tor).

Ao pechar sesión volves á pantalla de acceso. Se era unha sesión amnésica, o seu cartafol bórrase; se era un perfil, desmóntase e o sistema esquece que existía.

5. Crear un perfil

Un perfil garda o teu /home cifrado entre arranques, nun disco á parte (outro USB, por exemplo) que RedderOS converte nunha caixa forte. Necesita polo menos 257 MB.

Na pantalla de acceso, preme Crear perfil…
Escolle o disco. Se é a primeira vez, marca «Es un disco nuevo: prepararlo como bóveda». Iso borra todo o seu contido e éncheo de datos aleatorios.
Escribe un nome (minúsculas, números, - e _) e unha frase de polo menos 12 caracteres, dúas veces.
O oco (0–7) vén escollido ao chou. Cámbiao só se compartes a caixa forte con alguén (consulta máis abaixo).
Marca «Entiendo que la frase no se puede recuperar» e preme Crear y entrar.

6. Volver entrar

No seguinte arranque, coa caixa forte conectada, escribe o nome do perfil e a frase. A busca tarda uns segundos: a chave derívase con Argon2id, que é lento a propósito.

Se o nome non existe ou a frase é incorrecta verás a mesma mensaxe: «No se ha podido abrir el perfil.» É intencionado: así ninguén pode comprobar se un perfil existe.

7. Apagar

Apaga desde a pantalla de acceso ou desde o escritorio. Non queda nada escrito no disco do equipo.

Para sobrescribir ademais a RAM libre antes de apagar (contra ataques cold boot), usa redder-wipe desde unha terminal (consulta Comandos).